ياريت قبل ماتتقمصوا،عاوزكم تفكروا شويه في شخصية إللي بتتقمصوا منه،علشان قمصتكم تجيب نتيجة ، في بعض الناس فهمهم سريع قوي ، وبعضهم يادوبك فهمهم على قدهم ، وبعضهم مابيفهمش حاجه خالص ، علشان كده لما تحب ترسم دور القماصل وهتتقمص من النوع الأول إللي بيفهم بسرعة ، بمجرد ما يشوف وشك ويسمع نبره صوتك ، يعرف على طول انك زعلان ومقموص منه ويصالحك ويطبطب عليك ، لو هتتقمص من النوع إللي مابيفهمش ، يبقى تعالي قابلني لو فهمك أو عبرك أو أهتم بيك.

تتعب تنفجر وهو ولا هنا لاهيسمعك ولا هيحس بيك ،علشان كده..ياريت..لما تكون مقموص من حد ، لازم تبقى عارف من الأول ومتأكد بتتقمص قصاد مين ، لو قصاد اللي بيفهم يبقى قمصتك وزعلك ممكن تجيب نتيجه ، ساعتها ممكن تبعد عن وشه شويه علشان يحس بغلطه ، أو تقلل كلامك معاه شويه ، بالطريقة دي هتبقى ضامن إن اللي قدامك ، هيفسرك ويقرأك ويتعامل معاك إنك مقموص منه.

طيب السؤال هنا لو طلع اللي مزعلك فهمه تقيل ، او فهمه على قده او مابيفهمش خالص ، هتعمل ايه ساعتها ، هل ياترى برضوا هتصمم تلعب معاه لعبة القمصه بتاعتك ، لو مصمم تلعب دور المقموص من واحد مابيفهمش ، يبقى أنت كده بقيت إيه ، بقيت واهم وهمان ، متوهم ، موهوم ، وهم.