النمط الانفعالي من الناس بيطلع يطلع وينزل على فشوش ، بس ممكن في الطلعه دي يخسر أقرب الناس إللي زي دول مابيعرفوش يتحكموا في انفعالاتهم وبيخسروا ناس كتير من حبايبهم ،على أتفه سبب بسبب هذا الإنفعال الشديد ، ولما بيهدأوا شوية ويمر الموقف ، بيفضلوا يعتذروا لغيرهم عن هذا الإنفعال السخيف.

ياترى نتصرف إزاي ونعمل إيه في المواقف اللي زي دي ، هنتعرض لبعض الأساليب الإرشادية الفعالة ، بس نجاحها بيعتمد على دافعيتك و إرادتك أولا وأخيرا.

الخطوة الأولى

لو استشعرت بدري بدري إنك ابتديت تنفعل ، وأنك مش هتقدر تسيطر على نفسك ، أنصحك ساعتها تنسحب من الموقف كله ، يبقى كدة أفضل لأن خسارة انسحابك ، لو قارنتها بخسائر انفعالك الغاضبة وفقدك للاخرين ، ستجد ان انسحابك سيكون أقل ضررا.

الخطوة التانية

درب نفسك في الموقف الانفعالي إنك تسمع اكتر من كونك تتكلم ، لأن كلامك المنفعل تتزايد حدته مع كثرة كلامك ، الى ان تأتي لحظة ماتبقاش فيها دريان أنت بتقول إيه ، وبتتصرف إزاي ، وساعتها بتكون فقدت قدرتك تماما في السيطرة على نفسك ، علشان كده جرب تسمع أكتر .

الخطوة التالته

خد وقت قصير في تفكير داخلي قبل ما تنطق الكلام وليكن ثواني معدودات وتأمل لو قلت كذا وكذا ، ممكن يحصل إيه ؟

هذا الحديث الداخلي هيوقف تدفق الإنفعال الغاضب ، لأنك ساعتها بتركز في مضمون الكلام مش مجرد التنفيس عن الغضب و بس ، حاول تجرب..مش هتخسر قد اللي خسرته قبل كده ، بسبب انفعالك على غيرك .