عارفين الكآبة بتيجي منين .. من الرتابه والتكرار اللي بتنام عليه بتصحى فيه ، مفيش جديد ولا تطوير في نوعية وأسلوب حياتك ،امبارح زي النهارده والنهارده زي بكره ، علشان كده حاول تجدد أسلوب حياتك ، والموضوع مش صعب ولا حاجه ، الحاجه الجديدة دي ممكن تكون اكله جديدة عليك ، ماكنتش متعود تاكلها قبل كده .

جرب ياسيدي ، ممكن يكون ستايل جديد في لبسك ، البس موديل جديد..مش يمكن يكون حلو عليك ،و يعجبك ويعجب كمان اللي حواليك ، ممكن يكون أسلوب جديد في طريقة كلامك ،وتتفاجىء أن الأسلوب ده ريحك جدآ ، ممكن يكون طموح في مشروع ، ممكن يكون قصه او تسريحه شعر جديده ، ممكن في تغيير مكان جديد بتتفسح فيه .

المهم عاوزك تكسر حاجز الرتابه والملل ، الحاجات الجديدة والبسيطه اللي بقولهالك دي ممكن تسبب لك جزء من السعاده المفقوده وماتخافش وانت بتجريبها ، جرب واستكشف واستطلع ولا يهمك ، انت مابتعملش حاجه وحشه ،لا قدر الله ، بس تبقى حاجه إيجابية ليك كنت بتعتقد لأوقات طويله ، انك ما بتحبش تعملها أو حتى تفكر فيها ، ساعتها هتحس إن في حاجه حلوه جديده في حياتك ، هتخليك تحب إنت وتتعرف على حاجات جديده في إنت.

و ياريت ماتقعدش تقول ، اللي اعرفه احسن من اللي مااعرفوش ، مش إحتمال ان إللي كنت بتقول ماتعرفوش ، لما تعرفه يكون أحسن من اللي كنت تعرفه قبل كده ، جرب صدقني مش هتخسر حاجه ،ما انت كده كده كئيب...جرب يمكن تتبسط ، وماتحطش في دماغك وبالك إللي حواليك هيقولوا ايه عليك اشغل نفسك بنفسك ولنفسك شويه لان اللي جنبك وحواليك..لا هيعجبهم انت قبل ما تتغير. ولا هيعجبهم انت بعد ماتتغير يبقى الصح ايه إنك تدور على انت وتاخد بالك منها مش تاخد بالك منهم .