في مثل شعبي عيب اني اقوله..لان ريحته وحشه ،أهل البلد عارفينه كويس أوي..(لو كانت الأسماء بتنشرى..كان سموه خ..ابن خ...) ،وعلشان الألقاب عندنا في مصرملهاش لاثمن ولا قيمه. ، بقى كل من هب ودب ممكن يحط قبل إسمه أي لقب ،هو شايفه وعاوزه دون أي وجه حق ، وده في بلاد الفرنج بيعتبروها تدليس وغش وخداع ، أما عندنا بيسموها فهلوة وشطارة واسترزاق .

طبعا الألقاب دي مش للوجاهه بس لأ ، وده الباب الخلفي للضحك على الناس واستغلالهم والنصب عليهم ،ياترى مين المسؤول في مصر عن حساب وعقاب هؤلاء المتنطعين بالالقاب التي لا يستحقونها أعرف وآحده.كانت من أفشل الطلاب عندي ، وإذ فجأة الاقيها مالية الدنيا بالصوت والصورة في كافة البرامج الإذاعية والتلفزيونيه ووسائل الاتصال المدفوعة الأجر ، وقد سبق أسمها سلسلة من الألقاب المعالجة المستشارة الخبيرة ،معذرة السلوك ،أخصائي التخاطب الخ .

ناقص تكتب لقب بتركب جلده للحنفيات البايظة ، كل لقب منها يهد جبل ،والناس بتتهافت عليها وفقا لهذه الألقاب ، ولما نفتح المسكوت عليه يقولك ده أكل عيش ،كأننا قاعدين في ورشه سباكه وبنتخانق على مرمه.

ياجماعة الموضوع كبير ومش مجرد أكل عيش واسترزاق وخفة يد وشطارة ، الموضوع بقى تدليس على الناس ، يعني نصب واحتيال.. يوقع صاحبه تحت طائلة القانون ، ليه الجهات الرسمية مابتتحركش..مش عارف ولا فاهم ولا مدرك. والغريب إن الأشخاص دي إللي عاملين زي الطفيليات ، بيظهروا في كل لحظه أمام وسائل الإعلام ، بالصوت والصورة والتايتل إللي واخد نص الشاشة ، بمنتهى الجرأة والتحدي وعيني عينك ووش وش بالألقاب المزيفه دي يعني الموضوع ما بقاش حد بيضحك على الناس واستغلالهم في الخفاء بس .. لأ.. ده بقى في ناس شغالين في الاعلام ، بيسترزقوا كمان من ترويج الناس دي ، وتسهيل دخولهم عبر تلك الجهات الإعلامية ذائعة الصيت جماهيريا..مما يجعل المصيبه مصيبتان والا إيه رائكم في معيد يعني كان لسه طالب من سنه وآحده بس بيتكتب تحت إسمه في التليفزيون أستاذ دكتور ، خدوا من الالقاب دي كتير ، تلاقي واحد بيدي نفسه لقب دكتوروهو مش محصل حتى تور .. ورزق الهبل على المجانين ، وواحد تاني مسمي نفسه خبير وهو يدوبك ، ممكن يكون عود جرجير ، والتالت..بيقول على نفسه مستشار ،وهو مش محصل حتى شوية فشار(بكسر الفاء) والرابع يقولك ناشت(ناشط) سياسي .. وهو تلاقيه ساقط إعدادية قديمه ، هو في ايه ياجماعه للدرجة دي وصل بينا التخلف .

والسؤال...؟

هو مين ياترى اللي مخه تعبان وحاسس بالنقص وكله عقد نفسية ،الشخص اللي حاطط قدام اسمه لقب مش لقبه ، على اعتبار عنده نقاط ضعف وبيحاول يعوضها ، والا الشخص اللي بيصدقه ، وبالتالي اعتباره أهبل وساذج ، والا الارزوقيه بتوع الترويح الإعلامي إللي بيسمحولهم بالظهور والتانيه في الحقيقة،الكل عاوز يتحط في التخشيبة والعرض على النيابة مع مراعاة التجديد في الميعاد..اختشوا يا شوية افاقين ...علشان كده انا قررت من فتره ، لما الاقي حد من الكائنات الطفيلية..المدعية للألقاب دي في جلسه خاصة أو ندوة أو مؤتمر أو ورشة عمل ، بقيت أكسفه واحرجه قدام كل الناس بالطريقة دي لو كل واحدعمل كده بعد فتره الكائنات المتسلقة دي هتبدأ تختفي وتندثر وتنقرض اكشفوهم.. وماتتكسفوش روحوا كاتكم الأرف مليتوا البلد.