في نمط من البني ادميين أمرهم غريب وعجيب دائما ما يفسروا سكوتك عل تجاوزهم معاك ، إنك ضعيف ومش قادر ترد عليهم ،ويستهفوك ويستعبطوك ،ومبيعملوش ليك أي قيمه والاغرب من كده إنك في كل مرة بتتهاون معاهم وتتنازل في حق نفسك ، يزودوها معاك ،ويعلوا معاك في الغلاسة والسماجه ،وإنت طبعا إبن ناس ومتربي ومابتردش عليهم ، قال إيه إنت بتعمل بأصلك.

بص ياسيدي.. بصي ياستي.. بصي يابنت.. بص ياواد..الصنف ده من الناس مابيجيش إلا بالرد عليه أول بأول ،لأنك لو مكسرتش سمه ، هيزيد ويزيد ومش هتعرف تواجهه بعد كده ،ولازم تحسسه إنك مش سهل وإنك قوي ولازم يعرف إن سكوتك معاه مش ضعف منك ، لأ وألف لأ ، وإنما سكوتك عنوان لاحترامك لذاتك ، لازم يطلعلك ناب صغير تقدر تعض بيه وقت اللزوم ، مش معقول سنانك كلها مطرمه ومتخلعه ، اعملوا لنفسكم وزن وهيبه ، استقيموا يرحمنا ويرحمكم الله