مش هتحتفل يادكتور فتحي...معانا بعيد الهالويين. أنا احتفل بالهالويين ليه... طيب ما احنا كل يوم بيعدي علينا هالويين بص لشعر ومنظر الوليه مراتك كدة، وهى لسه قايمة من النوم.. من غير مكياج ولا أي حاجة على وشها هيجيلك فزع و رعب السنين.. وممكن كمان تقطع الخلفة.. هو ده مش هلويين طبيعي...بس وشوش الناس وهم نازلين رايحين الشغل الصبح.. وشوشهم تقطع أم الخميرة من البيت، اكتئاب وضيق وتوتر.. مايقدرش أحسن ممثلي هوليوود من تقليدهم.

هو ده مش هلويين طبيعي.. بصي ياولية كدة على شكل جوزك ...وهو قاعد في البيت يوم إجازته...وهو لابس الفانلة الداخلية المكرمشة..واللي مبينه نص كرشه التحتاني..ولا الشورت فطوطة اللي مخلي شكله زي البغبغان وشعره المتنعكش وعينيه الوارمة زي مناظر الزومبي في أفلام مصاصي الدماء المنظر ده.. لوحده هالويين طبيعي..بص للطوابير وأنت رايح تقضي مصلحة..واللي وراك قاعد وراكب فوق راسك...وعمال تعدل في همومك كأنك خارج من الحمام والدش المنظر ده..لوحدة هالويين طبيعي.

بس البنت بنتك مقصوفة الرقبة واللي عامله فيها نضيفه قوووي قدام الناس.. اتفرج على اودتها عاملة زي موقف أحمد حلمي.. حاطه الطبق اللي أكلت فيه على المخدة.. وحاطة الشراب المعفن بتاعها ف الدرج من غير ماتغسله.. ورامية اللب والسوداني وقشر الموز على تسريحتها المعفنه المنظر ده..لوحده هالويين طبيعي.

بص للواد ابنك.. وهو حاطط ٢ كيلو جيل على دماغه.. واللي قصة شعره عامله زي عرف الديك الشركسي.. وشوف التوكه اللي رابط بيها شعره .. شكله زي ديل البطة الجربانة.. اللي مش لاقية حتى تأمين صحي تتعالج فيه، وشوف كمان  البانطلون المقطع بتاع المحروس ابنك اللي يتشك في حباب عينيه.. وكأن أمه وأبوه بيشحتوا عليه.. و حاطط الكوليه خمسة وخميسه عليكي يا أختي. على صدره و حظاظه برشلونة  في إيديه... والبنطلون الفيزون البمبي اللي بيتلبس باللابيسه.. والأندر بتاعة باين من ورا ماركه قوطونيل  هلا هلا..على الفانلة ممكن يخليك تغمى عليك من الخضه.  هو ده مش هلويين طبيعي.

بص وانت ماشي...هتلاقي عيال واقفين على النواصي بيتحرشوا باللي جاي ورايح من البنات والستات وماحدش بيعملهم حاجة هو ده مش هلويين طبيعي.

بص للشباب الحديث الجواز اللي قاعد على القهاوي وبيلعبوا بلاي ستيشن وبيشربوا شاي أخضر وسايبين زوجاتهم وأولادهم في البيوت بدون أي اهتمام ولا رعاية هو ده مش هلويين طبيعي.

بص للست في بيتها.. لما مصروف بيتها مايكفيهاش خمس أيام وتقضي بقية الشهر كوابيس وأعراض اكتئاب هو ده مش هلويين طبيعي.

بس الستات مصر وهم بيذاكروا لعيالهم.. وبيعملوا معاهم الهوم وورك.. وهم مش فاهمين ولا كلمة من اللي ولأدهم بيدرسوه.. وعاملين قدام ولادهم إنهم عباقرة.. وهم في الأصل رأس ذبابة أرمله فقدت جوزها.. كفاية كدة النهاردة.. هالويين طبيعي.. قال حفلة قال.