دايمًا بنسمع كلمة يا بختها، تزوجت يا بختها، ناجحة يا بختها، مبسوطة يا بختها، بتحب وبتنحب يا بختها
ما فيش كلمة تانية غير يا بختها؟
هو ليه مجتمعنا بيحكم بالظاهر، دون تركيز على الشكل، أو تركيز في أبعاد الأمور والنظر إليها من جهات مختلفة؟
مين بيقول يا بختها؟
ده جايز شايله هموم الدنيا بس بتعرف تخبي علشان كبريائها
يا ناس في ناس ناجحين فعلا بس مش مبسوطين
انتا و لا هو بتعرفوا الشخص الناجح ده بيتعب إزاي؟
و لا شاطرين بس تحسبوا ده ثري ده ناجح ده معاه فلوس كتيرة في البنك، ده ناجح في شغله و مشهور يآه و كمان يا بخته هو مين زيه.
ليه بقينا كده؟
ليه شاطرين بس نحسب لكل واحد، دون التركيز مع أنفسنا ونترك الناس في حالها
ده جايز الشخص المحسود شايل هموم الدنيا كلها بس حضرتك لا تعلم علشان مش هيجي يقولك أنا زعلان و لا أنا شايل هموم كتيرة و لا أنا مش مبسوط فعلا و لا أنا مش مرتاح خالص في الحياة و لا أنا مش لاقي شخص يفهمني ويحس بيا فعلا.
بس كل الناس دلوقتى بقت شاطرة بس تقول ياه يا بخته مين زيه يا عم
و لا اسكتي يا شيخة يا بختها ديه بنت المحظوظين ،ده جايز تكون أكتر وحدة مش محظوظة و ما عندهاش بخت خالص بس إنتو فاكرين كده علشان الناس لا تفكر إلا في جانب واحد فقط.
ياه ياما ناس مخبية جراح كتيرة وبتعيط كل ليلة بس ما فيش حد شايف و لا حاسس
يا ريت لو يكون عندنا دم ونحس بالناس التانية وبلاش نحكم على حاجة إحنا مش عارفينها وخاصة الإنسان الناجح علشان النجاح مش موضوع سهل زي ما الناس مفكرة
الشخص الناجح ده شخص ناضل و تعب وتنازل على حاجات كتير وأولها راحة البال والسعادة وكتير حاجات ممكن أنت لاقيها بس هو محروم منها.
فيا ريت بلاش كلمة يا بخته بس نغيرها بكلمة ربنا يوفقه و يكون معاه و يهدي باله اعتقد الكلمة دي هتكون أفضل ليك و ليه.