هو في أيه بالظبط.. بصراحة اخونا الفنان العجوز آخر عرسان الوسط الفنى مزودها حبتين ..لا شوية حبيات كتار.. رايح جاي واخد المصورين فى رجليه أو ربما هما اللي ماشين وراه طب يا زملاء انتو تاعبين رجليكم وراه ليه؟!
يبدو أن العريس الفنان فرحان باللعبه ..ومبهور بالجوازة وكأنه اول مرة يتجوز أو ربما أنه فرحان بالاضواء مع أنه فنان وان كنت أنا عن نفسي معرفهوش ربما جهل فنى منى أو ربما أنه ممثل علي اد حاله!
طب ياسيدى انت اتجوزت عل العين والراس مليون مبروك ربنا يسعدكم ايه الداعي انك توافق علي عمل لقاءات صحفية وانت في الصباحيه ولابس البيجامه وشبشب الزنوبة وعروستك بلبس البيت ايه الداعي انك تتصور وتسجل لقاءات وانت داخل علي فندق في الغردقة تخدلك يومين عسل؟!
ايه الداعي للطبلة والزمارة وانت في الأوتيل أو القرية السياحية؟! وايه الداعي انك تتصور مع عروستك وانت في سوق الغردقة بتتمشي ؟!
يا سيدى لا انت اول ولا آخر عريس عجوز وعروسة من دور عياله .. يمكن حضرتك عايز تغيظ طليقتك ام عيالك مع انه بيقولوا أنها فنانة زميلتك ولا ايه بالظبط ؟!
ربك اعلم بنواياك ..والله العظيم انا مش بتنمر عليك من حقك تتجوز واحده واتنين وتلاته ولكن زعلان عليك.. وعلي شيبتك ..عيب كده وكتير اوي كده يا عم احترم سنك وفنك وطليقتك دى برضه عشرة والعشرة متهونش إلا علي قليل الأصل ..خليك مع عروستك من غير اضواء عشلك يومين مع نفسك من غير بهرجة عل الهوا..افرح لنفسك واحنا فرحانين لفرحك ومش غيرانين منك بس كفاية كده سيب الناس في همها .