اطفي النور..

طلع الزبالة برة الشقة.

أقفل نور السلم

أتأكد إنك قفلت الباب كويس بالترباس ..

طلع هدومك إللي هتلبسيها بكرة واكويها..

ماتنساش تغسل إيدك المعفنة دي قبل ماتاكل

شيل طبقك ومعلقتك بعد ما تاكل وحطهم في الحوض

أغسل وفرش أسنانك بعد ماتطفح

روق مكانك إللي إنت كنت بتاكل فيه..

أمسح الترابيزة..

حط بقية العيش في الكيس علشان ماينشفش.

اقلع هدومك لما تيجي من بره..

حط هدومك إللي فيها عرقك المعفن في الغسالة..

الأندر مايتلبسش إلا مرة واحده ويتغير ياغبي.

مش شايفني عيانة ياموكوس..

أتنيل لم الغسيل من على الحبل.. زمانه عفن..

أوعى حاجة تقع منك عند جيرانا إللي تحت..

طبق الغسيل إللي هتلمه كويس.. أنا عارفاك أهبل

أوعى المشابك تقع منك.. ما أنا عارفك إيدك سايبه..

حط  هدوم كل واحد  في الرف بتاعه

بصوا بقى ياناس.. ياهوووووووو

دي إرشادات وتعليمات  من قاموس كل الأمهات المصريات.

بتفضل الأم  السكينة تقولها وأسمعها وتكررها في اليوم يجي ألف مرة.

طبعا لو العيل أو البت إللي قدامها  كان بيفهم..

كان  زمانه حفظ الليلة كلها في أسبوع..

ولو امتحن فيها يجيب ممتاز..

لأ..

الواحد  منهم بيكبر و يبقى عامل زي الشحط...

وتلاقيه زي البغل.. أو زي الجاموسة...

ويتجوز.. ويروح بيته مابيعملش أي حاجة..

من الحاجات إللي دم أمه أتحرق فيها ربع قرن

مابيعملش أي حاجة من دي خالص..

ياحرقة دمك ياحاجة على كل السنين الأونطه دي

الله يكون في عونك يا مراته..

بس أحب أقولك كلمه في ودنك..

تفتكري البغل إللي مااتعلمش على أيد أمه..

ممكن واحدة هفأ زيك هتعلمه

إنت واهمه يامدام وعايشه الوهم..

رسالة لام مينرفا.. وأم ناتالي وأم مازن وأم فريدة.. وأم حلا وأم سوسو.