جدع ابن بلد ده فعلا إللي في خيالي، مش كداب ولا أناني و ما بيعرفش يعزف أوتار غير حقيقته، طبعه مش عايزه طبع يغلبني.

آه جدع، لا بيعرفش يتجمل ولا يكون داء، بالعكس هو داء و مضمد، ما بيعرفش يكسر بالعكس هو بيقوي، مالوش في الجحود و لا النكران.

آية في الذوق و الأخلاق و الجدعنة.

دعني أضع النقاط على الحروف وأوضح الأمور.

أنا ماليش في اللف و الدوران

أنا ماليش في دور الضحية و لا سرد القصص و التفاصيل

أنا ما بشوفشي الوشوش الكدابة و لا بتهمني الوعود و المواعيد

أنا بحب الجد و صديقي الجدعنة

أنا ما بحبش أكون في دايرة ضيقة و لا في مركب في وسط موج هايل

مش عايزة لا أعيط و لا أخاف و لا أدعي على حد

و لا انجرح و أعيط في ليلة ما فيهاش قمر

هي الدنيا ناقصة علشان نموت بالغلب و القهر ؟

أنا ماليش في لهفة البدايات و لا حكايات الشوق وفراق النهايات

أنا مش عايزة يكتبلي أبيات من الغزل و مش عايزة أهجي فيه شعر و أشهد عليه كل الناس.

أنا مش عايزة يلقبني ألقاب و لا يحكيلي روايات

أنا مش عايزة أكون دفتر يكتب سطر اسمي مع بنات غيري

أنا مش عايزة يرسملي صورة الغلبان الضعيف علشان يكسب قلبي

أنا عايزة أشوف بعيني مش بعين حد تاني

عايزة أكون شايفة مش عايزة أكون عمياء

عايزة أكون جامدة مش عايزة أكون هبلة

مش عايزاه يبكي قدامي علشان أسنده

عايزاه يكون جامد يسند كل الناس بجدعنته

مش عايزاه يشكيلي من الدنيا عايزاه يحببني في الدنيا هي ناقصة شكوى؟

مش عايزاه يذبحنى وأكتب شعر من جرحه

و لايزرع في قلبي الشوك و ينزف جرح مطرح الورد

عايزة صورة حقيقية مش صورة وهمية

علشان أنا عارفة كل سطر من أول حروفه

ابن بلد شهم و جدع و واثق في خطاه

صورة حلوة قوي يا ريت كل بنت تفهمها علشان ما تكونش غلبانة و يغلبها بالأنانية وياه.