إللي يحبك حبه..

وإللي مش طايقك.. ما يلزمكش

في حياة كل واحد مننا..

نوعيات  مختلفة ومتنوعة من الأشخاص..

في ناس بتحبنا.. وفي ناس بيكرهونا..

 وفي ناس مش فارقه معاهم...

#النمط الأول

حد جنبك على طول وفي ضهرك..

حاسس بيك... ويفهمك من غير ما تتكلم...

سعادتك هى كل مراده في الحياة...

إنت ليه  زي الرئة إللي بيتنفس بيها الدنيا..

آه... لو في يوم  زعلته منك.. أو ابتعدت عنه..

كده بتحطه وترميه في دايرة الدمار..

الشخص ده.. بيحبك بجد.. ليك ولنفسك..

مش علشان أي مصلحة له..

عاوزك وإنت بتقرأ الكلام ده..

تحدد مين من النمط ده عندك...

و بفكرك وأذكرك... ياريت تمسك فيه بأيدك وسنانك..

صدقني.... الأشخاص دي ما بتتعوضش...

إوعى تفكر إنك  تقطع علاقتك معاه..

و لما تزعل منه... ماتطولش فترة زعلك...

أشخاص بيلونوا حياتنا باللون الوردي المبهج..

ولما بيرحلوا عن دنيتنا..أو يسيبونا

بتبقى حياتنا من بعدهم خالية من أي معنى للبهجة..

ساعتها بنقول أهو إحنا عايشين والسلام..

ياريت ننتهز فرصة وجودهم جنبنا..

ونعبر لهم عن حبنا وامتناننا ليهم..

#النمط التاني..

في حد جنبك.. عايش معاك وهو بعيد قوووي عنك..

يتكلم معاك.. وهو يقصد حاجة تانية..

يقرب منك وهو بعيد عنك..

يبتسم في وشك وابتسامته من وحي خيالة لحد تاني

بيعمل إنه بيساعدك وإنت في الأصل مش في دايرة اهتمامه..

إنت وهو كل واحد في عالم غير التاني..

مع إنكم قاعدين واكلين و شاربين مع بعض..

الحد إللي بالشكل ده..

يا إما تسيبه لعالمه يمرح فيه زي ماهو عاوز ..

لا تلومه ولا تعاتبه ولا تنتقده ولا تراجع تصرفاته..

اعتبره مسافر معاك في الرحلة لكن محطاتكم مختلفة.

من غير ما تفضل كل لحظة تفكره بأنه بعيد عنك ومابيسألش فيك..

أو تحاول تقرب من عالمه وشوية شوية..

يمكن ياعالم يبقى من نفس عالمك وتندمجوا مع بعض..

#النمط الثالث..

حد مابيحبكش لله في لله كده..

ويشوف العمى ولا يشوفكش ...

مجرد ذكر اسمك بس قدامه..

كفيل بأنه حالة وكيانه بيتغير....

إنت بتمثله بسلوكك العام معاه تهديد لذاته..

كل ده وإنت أصلا ماتقصدش ولا تعرفش..

والغريب إنك مش بتكره الشخص ده...

وماعندكش أي نية لأذيته... أو ضرره..

الحد إللي زي ده..

أنصحك بالابتعاد عنه.. وعدم الاقتراب منه...

الدنيا مش هتوقف عليه...

ومتسمعش أي حد يقولك كلام تاني..

إللي زي ده عامل زي المر والحنضل...

كل ما معرفتك بيه  زادت عن حدها..

كل ما هو ركز معاك قوي و إزاي يضرك آكتر.

وبالتالي الحقد والغل والصفار هيكون آكتر..

مجرد خاطرة