للدرجة دي أنا كنت مخدوع في فلان أو فلانة.

أنا مش مصدق نفسي... أنا هتجنن.

عبارات قاتلة بتلف وتدور في ذهن كل مخدوع.

ومصحوبة بكل مشاعر المرار والوجع.

خاصة لما يكون إللي خدعك وضحك عليك.

كان آخر واحد في الدنيا.. لا يمكن تشك فيه لحظه..

بص ياسيدي المخدوع.. بصي ياسيدتي الـ مخدوعة..

أولا احمدوا ربنا إنه كشف ليكم إللي خدعكم..

واشكروا كمان الظروف إللي  كشفت ليكم قناع الخادع.

بس عاوز أقولكم كلمتين فيهم الشفا  زي ما بيقولوا..

في الوقت إللي بتشوف فيه إللي خدعك..

شخص سييء ومش أصيل وخاين العشرة..

يا ريت ما تنساش إنك تقول لنفسك كمان..

أنا كنت مغفل وساذج وعلى نياتي جدا..

مفيش حاجة في العلاقات الإنسانية اسمها، ثقة ١٠٠ ٪..

لازم تبقى عامل حساباتك ولو بنسبة صغيرة..

على عكس توقعاتك للي قدامك..

مهما كانت نوعية وشدة علاقته بيك..

وعاوزك دلوقتي ترجع بشريط الذاكرة شوية..

في علاقتك بإللي خدعك وضحك عليك..

وتركز وتدقق قوي في كل مواقفة السابقة معاك..

صدقني بلا مبالغة.. هتلاقي الشخص الخادع ده..

كان بيخدعك في كل المواقف إللي قبل كدة..

بس للأسف ثقتك المفرطة فيه واطمئنانك ليه..

كان معمي بصرك ومش مخليك تشوفه كويس..

أحرص في كل تعاملاتك على الحرص..

وما تسلمش نفسك كلها لحد...

وأنت بتلوم إللي خدعك..

ياريت كمان تلوم نفسك..

لأنك إنت شخصيا إللي خليته يخدعك.

#فن إدارة التفاعلات الإنسانية

مجرد خاطرة