عارفين معظم مشكلاتنا بتيجي منين، من تصرفاتنا المندفعة التلقائية التي لا نفكر فيها ولا نعمل لها أي حساب.

قال إيه...دي طبيعتي واللي عاجبه عاجبه، وأنا واضح وصريح.. واللي جوايا برايا... الكلام ده غلط...طبعا... نيتك اللي جواك دي بتاعتك أنت لكن سلوكك مع غيرك...إنت شخصيا مسؤول عنها أمامه ..
مش كفاية إنك تبقى عارف معنى كلامك اللي بتقوله لغيرك.

المهم كمان إنك تبقى عارف ومتوقع الكلام ده هيوصل للي قدامك إزاي وهيفهمه إزاي وهياخدوا على أي محمل، خاصة إذا كانت الناس دي تعز عليك ومهمين بالنسبة لك.

يعني مثلا.. إيه الحكمة إنك طول الوقت... كل ماتشوف وتقابل صاحبك اللي لسة ربنا مارزقهاش بالعيال تفضل بالساعات تكلمه عن ولادك الصغيرين لعبهم ولبسهم واكلهم وأعياد ميلادهم ومدارسهم.

إيه الحكمة إنك على طول وكل وقت بتتكلم عن سعادتك واستقرارك الزوجي مع صاحبك اللي بيعاني من سوء توافقه مع شريك حياته إيه الحكمة إنك تفضل تتكلم عن صحتك ونشاطك وحركتك مع صاحبك المعتل صحيا ومرضيا.

كل اللي فات ده.. حاجات بنعملها تحت شعار.. التلقائية والعفوية مع إنها أسلوب قاتل لغيرنا وإحنا مش شاعرين ولا حاسين بأثارها عليهم وبعدين نرجع نقول هى الناس ليه بتنفر منا وتبعد عنا.

الناس ياسادة بيقربوا من اللي بيعدد محاسنهم وبينفروا ممن يعدد مساؤهم ونقاط ضعفهم.

يارب نكون فهمنا.