مش كل قمصة منها... نفضل نبرر ونعاتب ونلوم...ونعمل حكايات.

مفيش اتنين متجوزين.. مازعلوش واتقمصوا من بعض.... عادي.. الزعل بين المحبين أنواع وأسباب كتيرة.

أهم أنواع الزعل الزوجي اللي الكثير من الأزواج مايعرفوش يتعاملوا معاه هو ... الزعل الإستراتيجي (الزعل من غير زعل)...

هتقولي دي فزوره ولا إيه هقولك دي مش فزورة، لما الزوجة تحس أحيانا بالفتور العاطفي من جوزها ومحتاجه جوزها يقرب منها ويطبطب عليها ويسأل عنها ويحضنها برفق ويقولها كلمتين حلوين وهو طبعا مش هنا ومش واخد باله منها ولا مهتم أصلا بيها.

تقوم تعمل نفسها مقموصة وزعلانه منه ... على أي سبب تافه أو أي حاجة لا تستدعي الزعل أو القمصة .مجرد تلاكيك.

طبعا الزوج الرومانسي العاطفي الحالم.... هيفهمها وهى طايره زي ما بيقولوا .. وهيفسر زعلها على طول بأنها بتناوشه بشكل غير مباشر فيقرب منها ويطيب خاطرها.

فجأة تلاقي ضحكتها نورت وملت وشها.. كأن الشمس نورت في يوم ملبد بالغيوم.. أما لو كان الزوج من النوع القفا والحيطه، أقصد المتبلد والمسطح وجدانيا وعاطفيا وانفعاليا.

فيفضل بالساعات يهبد ويهري في كلام في كلام و يدخل معاها في مناقشات حاميه وينتقدها على هيافة و تفاهة أسباب زعلها.. وهاتك ياشرح وتفسير وحرقة دم بالساعات ويمكن يطلعها في الاخر مريضه وهايفه... وساذجه وطفله بتزعل من اي حاجه.. حاول تفهم ياغبي ... ده زعل إستراتيجي ..الغرض منه إنك تروحلها وتحتويها.. مش تحرق في دمك ودمها في حوارات مفكسنه.

يارب نفهم..

#مجرد _خاطرة