الثانوية العامة هى الشغل الشاغل و حالة الطوارئ والميعاد المرتقب لكل بيت به طلبة بالغين تبدأ السيرة الذاتية للثانوية العامة تتداول بين أفراد العائلة قبل الهنا بسنة الأم والأب والجد والجدة والأعمام والأخوال و الخالات وحتى الجيران يتبادلون الحديث عن أساطير الرعب والفزع والخوف من جاثوم الثانوية العامة الذى يطبق على أنفاس الأسرة كا لكابوس المزعج و يتبادلون القصص الكئيبة عن خطورة وصعوبة وضغط وتكاليف الثانوية العامة .

ولا يكاد يخلو بيت في مصر سنويًا، من طالب أو طالبة في مرحلة الثانوية العامة، وناهيك عما تتكبده الأسرة من مصاريف طوال السنة على الدروس الخصوصية، فإن الطامة الكبرى تتمثل في الأزمات النفسية التى يعاني منها الطلاب في هذه المرحلة العصيبة والتي تعتبر مفترق طرق، حيث تشكل مستقبلا كاملا، مما قد يؤدى إلى محاولة إنتحار البعض منهم .

ولا ننسى أنه في إحدى الأعوام وقعت 7 حالات انتحار على مدار 48 ساعة بمجرد إعلان النتيجة ومعرفة هؤلاء الطلبة برسوبهم، فمنهم من ألقى بنفسه إلى الترعة ليموت غريقًا، ومنهم من تناول سُم فئران، وآخر تناول صبغة شعر، فيما أنقذت العناية الإلهية البعض منهم.

الجو المشحون بالضغوط النفسية التي تخلقها الثانوية العامة، والتي ترسل بظلالها السوداء على الطالب والأسرة معًا، يعد أمرًا مريرًا، مما يجعل السنة الدراسية قد لا تمر بسلام ، وقد أعلنت وزارة الصحة والسكان إحصائية تفيد أن 30% من طلاب الثانوية العامة يعانون من أعراض ومشكلات نفسية منهم 21% حاولوا الانتحار و10٪ أقدموا على التدخين ،وذلك من خلال دراسة أجرتها على ١٣ ألف طالب بالمراحل الثانوية المختلفة في محافظات القاهرة والمنوفية وأسيوط بواقع ٣٢٠ فصلا.

وأوضحت أن الأعراض النفسية تمثلت في ٨ مشكلات هي أعراض القلق والتوتر بنسبة17% والتلعثم في الكلام بنسبة 14% وأعراض الاكتئاب 14% وعدم الرضا عن الشكل 9,5% والخجل الاجتماعي5,6% ، وأعراض الوسواس القهرى 2,7% وظهر إيذاء الذات بنسبة 19% والتفكير في الانتحار بنسبة 21,7 ، وهناك مفاهيم عديدة خاطئة لدى مجتمعنا، ومنها أن الثانوية العامة هى السنة الدراسية التى تحدد مستقبل الطالب، وهى المرحلة الفاصلة، وينعكس ذلك على أذهان الأسر المصرية التى توليها اهتمامًا مبالغ فيه، حيث يتضح ذلك من خلال بعض الكلمات التى ترددها الأمهات بشكل دائم والتى تعطى الموضوع برمته أكبر من حجمه، مثل "ذاكر هتفشل"، "لازم تجيب مجموع زي فلان أو فلانة".

و أن الاتفاق المبكر على الدروس الخصوصية وتكدس المراكز التعليمية ثقافة خاطئة، مشيرة إلى إعتماد الطالب على الدروس مع الضغط النفسي من الأبوين نتيجة عزوف الطلبة عن الذهاب إلى المدرسة وذلك لتعارض مواعيد الدروس مع مواعيد المدرسة جعل الأمر برمته غير متسقًا ويبعث على الضيق لدى الطالب.وإليكم بعض النصائح :

- مبدئيا كده نقول للطالب خليك واثق إن ربنا لن يضيع تعبك ذاكرت كتيير أو قليل هتاخد على قد تعبك بالظبط وربنا لن هيخيب ظنك .

- الدنيا رمضان واستغلو جداً الفترة دي فى الدعاء واطلبوا من ربنا كتيير .

- الحجات إللى لازم تاخدوا بالكم منها قبل أى إمتحان سواء كنت مخلص أو لأ دحيح او لا لازم تعملها علشان تجيب أكبر قدر من الدرجات .

ركزوا هذه تعليمات تنموية مدونة فى كتب علم النفس ..

1ـ متذاكرش معلومات جديدة ليلة الامتحان :

ليلة الامتحان بروفة نهائيه يعني مفيش فيها أي حاجة جديدة عشان الجديد اللي هتحاول تذاكره لأول مرة هيقلل من تثبيت القديم .

حاول تراجع علي المنهج بطريقه سريعه كده بحيث تذكر نفسك بكل المعلومات اللي ذاكرتها قبل كدا ، ولو مقدرتش راجع علي أهم النقاط .

2ـ لازم تنام كويس جداً ليلة الإمتحان :

النوم الكافي ضرورة وأولوية عشان لو رحت تعبان ومش مركز فيه خطورة إنك متقدرش تفتكر إللى مذاكره ومش هتكون مركز هتحتاج في الإمتحان تكون مركز وهادئ ، نام حوالي 7 ساعات كاملة .

3ـ في صباح يوم الامتحان :

إصحي بدري شوية عشان متكونش متوتر ومستعجل ، ابدأ يومك بالصلاة والدعاء عشان قلبك يمتلأ بالراحة ، إوصل لمكان إمتحانك بدري وإعمل حساب الظروف ، ولما توصل إبعد عن( أصحابك) إللى من عادتهم إنهم يوتروا نفسهم وغيرهم .

4ـ لما تستلم ورقة الأسئلة بلاش تخاف او تتوتر :

المعلومات اللي ذاكرتها متخزنة في العقل( المفكر) ، التوتر والقلق والخوف بيقفل العقل المفكر يعني مش هتعرف تفتكر وهتفكر نفسك نسيت كل حاجة وده مش صحيح.

هعلمك طريقة مجربة :

أول ما تمسك ورقة الأسئلة سيبها مقلوبة واقرأ شيء بتحبه وترتاح له من القرآن وادعي ربنا بيقين ، وحل ولو سؤال واحد عارفة جدا طالما فتحت الطريق للعقل المفكر خلاص هتفضل فاكر إن شاء الله وهتكمل حل ..

5ـ حاول يبقي معاك ساعة في الامتحان :

لازم يكون معاك ساعة ، قسم الوقت على أسئلة الامتحان وسيب نص ساعة في الآخر زيادة احتياطي أو ثلث ساعة ، حط لكل سؤال وقت عشان مفيش سؤال يأخد وقت كبير على حساب الباقيين ، وتابع الوقت بشكل منتظم عشان تتأكد أنك ماشي صح .

6ـ ابدأ بإجابة الأسئلة إللى عارفها كويس جداً .. وده هيفيدك بـ 3 حاجات :

1ـ الفائض من الوقت الخاص بيهم هيروح للاسئلة الأصعب واللي محتاجة وقت أطول.

2ـ هتطمن لما تلاقي نفسك حليت كثير من الامتحان ولسة قدامك وقت تفكر وتحل الباقي.

3ـ السؤال الصعب اللي بيقابلك وتسيبه وتنقل على غيره عقلك بيكون لسة شغال عليه وبيجهز الإجابة ولما ترجع له تاني هتلاقيه أوضح وأسهل .

7ـ اقرأ الاسئلة كلها بعناية وتركيز :

اقرأ السؤال كامل ومرة واثنين وثلاثة ، تأكد من السؤال في أي جزء وإيه المطلوب بالتحديد ، وتأكد من أجزاء السؤال وهل السؤال فيه أكثر من مطلوب واحد وحاول تعلم عليهم بالقلم كدا علشان تبق عارف ، واقرأ رأس السؤال كويس جدا جدا ، ولو حاسس انه محتاج حاجه معينه اكتبه تنويه جمبها علشان تفتكر .

8ـ سؤال الاختيار من متعدد :

لو محتار بين عدة إجابات أو مش عارف تختار الإجابة الصحيحة ، تقدر تستخدم طريقة (استبعاد الإجابات الخاطئة). .. على طريقة" جورج قرداحي " في من سيربح المليون ، ساعات مش هتقدر تعرف ايه الإجابة الصحيحة ولكن تقدر تحكم بوضوح إن إجابة معينة خطأ وهكذا لحد ما هتعرف الصح وانت بتختار الاجابه بردو استطعمها كدا علي الجملة وشوفها راكبه ولا لأ، وخصوصا ف الانجليزي .

9ـ متغيرش اجابتك بسهولة :

الدراسات أثبتت إن أول إجابة بتخطر للطالب بتكون هي الإجابة الصحيحة غالبا ، عشان كدة متغيرش الإجابة إلا لو افتكرت بوضوح الإجابة الصحيحة وكنت متأكد .

10ـ الغش :

خلينا متفقين ان مفيش حد بيبقي داخل علشان يقفل ويجيب مجموع عالي ويبقي مركز علي الغش ، حتي لو لقيت حد بيغش حواليك ، ركز علي اجابتك والنبي لان كلام الغش ملوش قيمه وممكن يضيعك اكتر ما يفيدك ، وخليكم دايما متأكدين عمر الغش ماهيساوي واحد ذاكر وتعب نهائي .

11ـ راجع كويس قبل ماتطلع من لجنة الامتحان :

دي برضه نقطة في غاية الأهمية ، المراجعة اللي تهمني إنك تتأكد من إنك جاوبت على كل الأسئلة ، امشي مع ورقة الأسئلة سؤال سؤال ، وأتأكد تماما ان مفيش سؤال بدون إجابة ، وإن كل إجابة غطت كل المطلوب. بعد كدة لو حابب تراجع الإجابت نفسها للتأكد منها وإضافة زيادة مفيش مشكلة..

12ـ راجع لما تروح البيت مع نفسك :

ناس كتيرة مش بتحب تراجع علشان متتصدمش ، بص انت حليت وعملت اللي عليك وزيادة ولو رجع الزمن مش هتحل أكتر من كده .... أخيراً أتمنى أن تنفعكم الإرشادات بالتوفيق والنجاح لكل أبناءنا وبناتنا إن شاء الله .