انت عارف مشكلتك الحقيقية... ممكن تكون فين ،وانت مش داري ولا عارف ..

أنا أقولك ...

إنهم وقت مابيحتاجوك في أي وقت بيلاقوك ، ووقت مابيتكسروا بتسندهم ، ووقت ما بيحزنوا بتطيب بخواطرهم ، ووقت مابيبكوا بتكفكف دموعهم.

ضامنين على طول إنك معاهم وجنبهم ، ومتأكدين كمان إنك على طول في ضهرهم ووراهم وعلشان انت على معاهم و ضامنين وجودك جنبهم أكيد مش هيشفوك ولا هيحسوا ولا هيشعروا بيك إنت بالنسبة لهم عامل زي فردة الاستبن.

اهتمامهم بيك وسؤالهم عليك علشان تمشيلهم العربيه لما تعطل بس بعد كده مابيفكروش فيك إلا لما تعطل عربيتهم تاني مش فارق معاهم إنك تعبان موجوع مهموم حزين ، كل ده مش مهم المهم عندهم ، انهم لما يحتاجوك ضامنين انك موجود ، علشان كده أهملوك ومابيسألوش فيك ولا عليك ، الا لما بيبقوا محتاجينك بس.

عاوز تعدل كفة الميزان وتخليهم يحسوا بيك زي مابتحس بيهم ، توقف شويتين عن عطائك ليهم ويوم مايقولولك مالك جرالك ايه...ايه اللي غيرك.. ساعتها..قولهم مالي عندكم وياللا نتحاسب...