مش معنى إنك زهقت تشيل كمامتك وتترك الكحول.. مش معنى إنه جالك قبل كدة إنك خلاص محصن ومش هيجيلي تاني.. بقى بيجي للأطفال وعادي جدا بس لسه نسبة الوفيات في الأطفال ضعيفة جدا الحمد الله.

لازم تاخد بالأسباب.. الكمامة السلاح الأول ضد الفيروس وهتحمى نفسك وأسرتك خصوصا مع حالة اللامبالاة التي تجتاح الشعب المصري.. إنزل في صلاة الجمعة مفيش غير ناس معدودين على الأصابع بس لابسين كمامة.. تجمعات الصلاة والشوارع والمواصلات بؤر محتملة فنصيحة خلي بالك الخطر لسه قائم والحالات فى ازدياد وهنرد هنا على أغلب تساؤلات.

س / أنا جالي قبل كدى اطمن يعني؟

ج لا طبعا ما تطمنش كل الدراسات اجمعت إن المناعة المكتسبة وقتية يعنى عدة أشهر فقط وترجع معرض للفيروس يبقى حضرتك معرض عادى يجيلك وخصوصا إن الفيروس بقي فيه عدة طفرات وبقي مختلف.

س / طيب أنا بتخنق من كمامة؟

ج ممكن تلبسها فى أماكن مزدحمة ولما تبقي لوحدك نزلها تحدد تنفس بس علميا تتخنق بصحتك أحسن ماتتخنق من نقص الأكسجين فى الدم وده عرض من أعراض كورونا.

س / أنا واخد مصل الإنفلونزا؟

ج هيقلل من الأعراض لكن لن يحميك من المرض ولا مضاعفاته.

حتى المصل المتوقع ليه إنه بيحمى بنسبه ٩٥ معنى كدة إن فى 5% ممكن تاخد مصل ويجيلك وبما إننا شعب محظوظ ممكن تبقي من 5% دول نستخلص من كلامنا إن مش معنى إنى أسيب الفيروس فى حاله هو هيسيبنى ده منطق القعدات مش العلم ولو بالدين بناخد بالأسباب.

نختتم كلامنا.. الفيروس بيتحور وبقي فى أكتر من خمس طفرات جينية وحتى المصل مش وقايه دايما ومناعة مش دايمه يبقي خوفا على نفسك وأسرتك كمامة دائما و كحول أو غسيل الأيدي بالماء والصابون أهم سلاحين اثبتوا نجاحهم.

الفيروس لن يرحل بالتجاهل الفيروس هيرحل بالالتزام بالإجراءات الوقائية.