بعض أصناف الرجال إللي الستات مابتحبهمش ولا يستريحن معهم..

راجل بخيل جلده....

طول النهار ماسكلها ورقة وقلم..

ونازل تسجيل كل قرش داخل وخارج....

ويفضل يحاسبها بالقرش والمليم ..

كأنها بتاخد وبتخنصر فلوسه وبتصرفها على أهلها...

ماسك قوي في الانفاق على كل إللي في البيت...

كل حاجه يحسبها بالفلوس علشان كده الراجل ده..

بيكره الفسح والنزهات والخروج بره البيت.

لأن الخروج معنى كده إنه هيصرف وهيفك كيسه....

وطبعا كل خروجاته مع مراته وعياله نكد في نكد...

والستات لهذا الصنف من الرجال بيجدوا متعتهن وراحتهن في عدم وجوده معهن.

والصنف ده عنده إستعداد يموت وتضربه بالنار..

ولا يصرفش قرش زياده عن إللي محدده في دماغه...

راجل عينه زايغه وفلاتي وبتاع نسوان(منسون) ...

تبقى مراته ماشاء الله عليها قيمه وسيما..

والناس كلها حاسدينه عليها ومش مقصره في حقه...

وتلاقيه بيسرح ويرمرم ويريل هنا وهناك...

ومقضيها سرمحه ومكالمات واتصالات مع البنات والستات..

ولما يتزنق من مراته بيبقى ساعتها عامل زي الكلب البلدي

انكار وتزييف ومماطله ومجادله ومش بعيد يطلعها هى السبب في انحرافه.

راجل مهمل في شكله ومظهره واناقته ولبسه وهيئته..

بيستخسر يشتري لنفسه أي حاجه تبرز أناقته..

طول ماهو قاعد في البيت بيبقى منظره يقطع القلب..

لا غاسل وشه ولا مسرح شعر ولا منضف ضوافره..

ولا لابس ملابس مكويه وملابسه مكرمشه كأنه مطلعها من بؤق كلب.

وماشي في الشقه حافي.. ولو حب يعمل فيها مرتب..

ممكن يلبس شبشب فرده وفرده ومعاهم بنتاكور الوان فطوطه زي البغبغان...

الشياكه والاناقة عنده إنه يقعد في بيته لابس فانله و سلب.

ونص كرشه طالع بره وبيقولك أنا قاعد في بيتي..

طيب إيه ذنب الوليه بتاعتك إللي شايفاك بالشكل ده ليل نهار.

هو ده مش بيتها برده.. ولا هى حاجزه في اوتيل عندك..

راجل بينازع مراته في كل أدوارها داخل البيت..

إن ربت عيل يتدخل و إن طبخت طبخه يعدل عليها..

وإن كنست أو نضفت أو روقت يتدخل في كل حاجه بتعملها

مش سايبها أي دور إلا لما يدخل مناخيره فيه...

حاجه تتطهق وتزهق أي ست...

راجل غيار جدا مفيش كلمه ولا إشارة ولا ايماءه..

إلا لما يعمل منها مشكله مع مراته لإنه بيغير عليها..

مقضي حياته كلها في الخوف عليها والشك فيها..

نستكمل في بوستات أخرى بقية الاصناف..