إزاي تكسب قلب مراتك بالطريقة المصرية، مش هقولك ادخل وفي إيدك بوكيه ورد وحاطه ورا ضهرك وتعملها مفاجأة، ولاهقولك تسمعها وإنتم بتتعشو سوا حتة مزيكا مونا مور .

ولاهقولك تعزمها على سهرة لمشاهدة، بحيرة البجعة في الأوبرا للموسيقي الرومانتيكي الروسي تشايكوفسكي وانتم الإتنين لابسين سواريه، ولاهقولك تعزمها على رحلة بحرية تطوفوا فيها شواطئ دول البحر المتوسط من غير ما تنزلوا، ولاهقولك تعزمها ترقص معاها سلو أو حتى فاست، هتقولي لما كل ده..لأ..لأ

أومال إيه بقى الطريقة المثلي لجذب انتباهها وخطب ودها.

أولا.. تساعدها في مذاكرة العيال وتلبيسهم وحمومهم، وتاخد بالك منهم لما تكونوا طالعين اي مشوار خارج البيت.

ثانيا.. ماتدخلش عليها وإيديك فاضية وإيد ورا وإيد قدام، معاك كيس فاكهة، شوية خضار، عيش جبنة.. بقسماط، أي أكل علشان أنت وأولادك اللي هيطفحوه.

ثالثا.. تقوم تلم الغسيل اللي بقاله يومين على الحبل، وياريت بالمرة تطبقه وتحطه في الدواليب.

رابعا.. لو لقيت الأرض مش نضيفة والأوضة مش مترتبه، تقوم ماسح و مسيق الأرض ومرتب ومروق الأوض.

خامسا..لما تروح معاها السوبر ماركت، يبقى تشيل الأكياس والعيال الصغيرة تاخد بالك منهم، وتديها الفيزا وتقولها كمان الباسورد بتاعها.

سادسا.. كل ما تلاقيها واقفه في المطبخ تقوم من سكات ودون زن منها، لابس المريلة وواخد كل المواعين وتغسلهم بس بأمانة وتحط الفيري صح وتنشف صح وترصص صح وياريت كمان تسحب المكنسه وتاخد الشقه كلها وش ترويق وبعدها ترتيب وبعدين تلميع.

سابعا.. كل ماتحس إن مصاريف الشهر معاها خستعت تجري و تحط في ايديها جزء من الاحتياطي النقدي.

ثامنا.. كل ما تلاقي باب شقتك خبط وبصيت في العين السرية وشوفت إللي يضرب على عينه بتاع الغاز أو الكهربا أو البواب أو بتاع الزبالة تقوم من سكات وبجنتله دافع وكاعع.. من غير ما تقولها دفعت كام أو تطلب منها فلوس.

تاسعا.. كل ما تروحوا أي زيارة في أي حته تقوم لامم الولاد، حواليك ومسيطر عليهم وبنظرة منك مايتحركوش، ويبقوا قاعدين زي الألف.

عاشرا.. لما تكون قاعد يوم اجازتك في البيت تقوم ترتب الأوضة، وتلبس في رجلك شبشب.. ولما تاكل ماتوقعش أي حاجه على الأرض، وبالليل قبل ماتتخمد تطلع الزباله بره وتطفي نور السلم.. ههههههه

عارف لو عملت التكليفات البسيطة دي.. هتبقى أجمل وأحسن وأفضل زوج في القارات الخمسه من وجهة نظر اللي ماتتسمى وهتكون فارس أحلامها ومش بعيد تعزفلك على الربابة والكمانجة قدام صاحباتها المقاطيع أحلى وأجمل موسيقي تصويرية لحضرتك كحبيب وفارس أحلامها أقصد اغنية تيتانك للرائعة الجذابة.. سيلين ماري كلوديت ديون.