صدقيني .. جوزك تنح ومش هيتغير..

#اطفي النور ياواد وطلع الزبالة برة الشقة.. اقفل نور السلم يامضروب واتأكد إنك قفلت الباب.. طلع هدومك ياواد إللي هتلبسيها بكرة واكويها .. ماتنساش تغسل أيدك المعفنه دي قبل ماتاكل.

شيل طبقك ومعلقتك بعد ما تاكل وحطهم في الحوض.. أغسل اسنانك بالمعجون بعد ماتطفح .. قوم روق مكانك إللي كنت بتاكل فيه وامسح الترابيزة.. ماتنساش تحط بقية العيش في الكيس علشان ماينشفش.. اقلع هدومك لما تيجي من بره وحط هدومك إللي فيها عرقك المعفن في الغسالة.. قلت ألف مرة ياحمار إن الاندر مايتلبسش إلا مرة وآحده ويتغير ياغبي.

مش شايفني عيانه ياموكوس اتنيل لم الغسيل من على الحبل زمانه عفن.. أوعى حاجة تقع منك عند جيرانا إللي تحت .. طبق الغسيل إللي هتلمه كويس أنا عارفاك أهبل.. أوعي المشابك تقع منك ما أنا عارفك أيدك سايبه .. حط هدوم كل واحد في الرف بتاعه... وماتنساش وانت بتنشر ماتعلقش الاندرات الستاتي على الوش.. فاهم يامضروب..... حاضر يا أما

بصوا بقى ياناس.. ياهوووووووو.. دي إرشادات وتعليمات أزلية.. من قاموس كل أمهاتنا المصريات أعمالهم الولاد تفضل الأم المسكينه تقولها واسمعها وتكررها في اليوم يجي الف مره.. طبعا لو العيل أو البت إللي قدامها كان بيفهم.. كان زمانه حفظ الليله كلها في أسبوع..

ولو امتحن فيها يجيب ممتاز.. لأ.الواحد منهم بيكبر و يبقى عامل زي الشحط وتلاقيه زي البغل أو زي الجاموسة ويتجوز ويروح بيته مابيعملش أي حاجة..من الحاجات إللي دم أمه أتحرق فيها ربع قرن، مابيعملش أي حاجه من دي خالص..

ياحرقة دمك ياحاجه على كل السنين الاونطه دي الله يكون في عونك يا مراته..بس أحب أقولك كلمه في ودنك.. تفتكري البغل إللي مااتعلمش على أيد أمه.. ممكن وآحده هفأ زيك هتعلمه، إنت واهمه يامدام وعايشه الوهم.. إذا كانت الحاجه أمه ماغيرتوش..هتيجي إنت يا فسلة وعاوزه تغيريه.. كان غيرك اشطر، دي رسالة لام مينرفا.. وأم ناتالي وام مازن و أم فريده.. و أم حلا و أم سوسو و أم فيفر و أم رشيد .

مجرد خاطرة