مهما وصلت درجة علاقتك بأي شخص.. زميلك ..صديقك.. حبيبك..رفيقك... وأيا كانت طبيعة علاقتك به... ياريت ما تقوليش إننا بقينا واحد.. لأ.

أنتم شخصين اتنين مش واحد...ما تخلهوش يعرف كل اللي جوه نفسك.. أفكارك وطموحاتك وتخطيطاتك ومشاعرك.

يعرف بعضها ماشي.. لكن يعرفها كلها بتفاصيلها.....لأ وستين لأ، حياتك وخبراتك....ده كنزك اللي لازم تحافظ عليه، احتفظ لنفسك ببعض هذه الأوراق الخاصة.

لنفسك وجوه نفسك ...وماتتكلمش فيها مع أي حد.. ماتخليش خصوصياتك مشاع ...يعرفها ويتابعها كل من هب ودب.. نتيجة رطرطتك بالكلام معاه تحت شعار أنكم أنتم الاتنين واحد.

ماتكونش كتاب مفتوح لحد يقلب فيه زي ماهو عاوز.. وماتتعراش قدام حد كائنا من كان..لا نفسيا ولا انفعاليا و لاسلوكيا تحت شعار إنك بتحبه وهو بيحبك لأ.. خلى دايما بعض فصول حياتك داخل كتاب حياتك.

محدش يعرف خزائنه ولا أسراره إلا أنت. ..متعرفش حد الأوراق دي ولا كمان تلوحله باللي فيها.. لأ كلمة ولا سطر ولا براجراف ولا موضوع. .الأوراق دي هى ملجأك وقت شدتك..ووقت تخليه وابتعاده عنك.

وافتكر دائماً ان الحد ده لما يهجرك ومعاه بعض منك..أهون بكتير إنه يهجرك وكلك معاه..ساعتها بس هتكون عبد ليه... وبتجري وراه علشان تحصل على إنت...اللي ضاعت منك وأصبحت معاه..وصلت الرسالة..ولا لسه.