المطبلاتية.... والرقاصين.. هم حملة المباخر وراء كل مسؤول..

أول مايشوف ولي نعمته في أي حته..

تلاقيه استعد بالطبلة وهاتك يادرابوكا....

بيعزف كل أنواع الايقاعات...

ويرقص كل الرقصات..بلدي .فاست..سلو

على حسب الأغنية إللي عاوزها سيده.

المطبلاتي ده موجود في كل حته...

خاصة في مجالات العمل....

وممكن يكون جواك مطبلاتي وأنت مش حاسس.

الشخص المطبلاتي بياكل على كل الموائد...

ويتحدث بألف لسان ولغه ولهجة...

ما لهوش عزيز ولا غالي...

أهم حاجة عنده مين إللي هيفيده علشان يطبله

شعاره ابجني تجدني...

سلوكه فاضح عامل زي صبي العالمه..

أقصد الرقاصة..

يتحدث بكل لسان...

بيزين لولي نعمته أي كلام في البتنجان ..

بارع في تزييف الحقائق وقلب الأوضاع..

يستمتع جدا بالانحناء والانبطاح لولي نعمته

بارع في مسح الأعتاب وتقبيل الأكتاف.

لا تجد في ملامح وشه أي أثر للكرامة أو ماء الحياء .

جلده سميك و لا تجد فيه أثر لاي احساس.

والغريب.إنه محبوب جدا من ولي نعمته وسيده

علشان كده سيده بيفضله وبيميزه بكل المميزات..

المطبلاتي ده بياخد كل المكاسب من غير مايبذل أي مجهود

وبيني وبينكم كده بالراحه...

هو مين إللي المفروض نقف قصاده ونمنعه

المطبلاتي إللي ماسك الدربوكه ونازل هز.

ولا إللي بيخليه يطبل ومبسوط ومتمزج..

إنه بيطبله وبيرقصله..

أنا شايف إن اللي بيطبله المطبلاتي هو السبب في أن المطبلاتي بيطبله..

ماتسيبوش الحمار وتمسكوا في البردعه الضعيفة

استقيموا يرحمنا ويرحمكم الله

مجرد خاطرة