بصوتها الإذاعى المميز،احتلت قلوب المستمعين،وبفكرها المستنير جعلتك تقف أمام موسوعة من الثقافة والفكر الراقي، وبأدائها المميز تمكنت من أن تكون حاضره لتصبح واحده من الاذاعيات المصريات الكبار الذين حققوا نجاح يلفت النظر،الاذاعية الكبيرة" إكرام حمدلله"،صاحبة الطموح الذى بدأ منذ خمسة وعشرون عاماً من قلب صحراء مصر الغربية ليستقر بواحدة من الاذاعات الكبري التابعة للاذاعة المصرية.

الى نص الحوار /

بداية ، متى بدأت مسيرتك الاعلامية، وأين؟

بدأت مسيرتى الاعلامية بدأت من 25 سنة بقلب صحراء مصر الغربية من محافظة الوادي الجديد حيث المولد والنشأة،اشتغلت فيها سنتين ولكن كان طموحى راديو العاصمة وبالفعل انتقلت لراديو القاهرة الكبرى.

ما هي اهم التحديات التي واجهتك في حياتك الاعلامية ؟

التحدى الاساسى كان ازاى اقدر اوصل لشريحة عريضة من الجمهور واتكلم بصوتهم فى كل مشاكلهم واحاول اوصل صوت الناس للمسؤليين لانى بشتغل فى اذاعة خدمية تنموية من الاساس

ما هو اللقاء الذي تعتبرينه الأبرز فى مسيرتك الاعلامية ؟

لقاءات كتيرة كانت بارزة منهم سياسيين فنانيين وادباء وروائين ولكن انا بعتز جدآ بلقائى مع الدكتور احمد درويش وزير التنمة الادارية فى حكومة مبارك.

كيف تنظرين للواقع الاعلامي للصحفيات والإعلاميات المصريات؟

الاعلاميات فى منهم كتير مميز ومختلف وبيقدموا مادة اعلامية مختلفة وجريئة وهادفة، ولكن هناك الكثير من الاعلاميات اتسلط عليهم الضوء و"عشان هم مش مؤهلين ولا يصلحوا انطفى نجمهم واصبحوا فى خبر كان".

هل ترين أن المرأة على المستوى الاعلامي مهنيا قد أخذت حقها ؟

المرأة على المستوى الاعلامى اخذت حقها واثبتت انها قادرة على ادارة المؤسسات الأعلامية ولو عدنا لماضى ماسبيرو هتجد ان اغلب من يقودون المبنى سيدات واثبتوا كفائتهم فهى اكثر مهنية.

من وجهة نظرك،ما هي مواصفات الإذاعيه الناجحة؟ من هم المذيعين او المذيعات المفضلين لديكى؟

مفيش مواصفات ثابتة للاعلامية الناجحة ولكن لازم تكون مثقفة وملمة بالاحداث او الموضوعات اللى هتتكلم فيها وتكون محايدة تمامآ،حاليآ مفيش حد مميز بالنسبالى او مختلف عن التانى ، اسماء كتيرة واذاعات مختلفة وتباينت التوجهات وتاهت الحقائق واصبحنا فى زمن تشابهت فيه كل الاصوات واغلب الموضوعات الا قليلآ ولكن فى النهاية بيلفت نظرى المذيع او المذيعة اللى ليهم فكر ومبدآ لا يحيدون عنه.

ماذا عن برنامجك الحالى والاستعداد لشهر رمضان الكريم؟

حاليآ بستعد لتجهيز برنامج مكسرات فنية للموسم الرابع على التوالى انا اللى بقوم باعدادة برنامج ثقافى فنى بيقدم كواليس الافلام والاغانى او المواقف اللى تمت فيها بشكل مبسط يقدر المستمع يستوعبها بسهوله ويستمتع بيها.

ما هي نصيحتك للإذاعيات الشابات؟

عايزة اقول للاذاعيات الشابات اللى موجودين على اذاعات خاصة ان اللى بيقدموه مش اعلام خالص ولا له علاقة غير بقعدة عالمصطبة شوية كلام فاضى على كلمة عربى وكلمة انحليزى والفاظ غريبة وتوليفة متلخبطة،معنديش نصيحة ليهم لأن دى دماغهم وفكرهم.

ما هو حلمك الكبير؟

كل يوم عندنا حلم مختلف واحنا عايشين بالحلم ومساحة الخيال اللى ربنا انعم علينا بيها وعلى فكرة برنامجى الاساسى اسمة حلمى وحلمك،توك شو اذاعى بيتناول كل الموضوعات والاحداث الجارية.