إيه اللي يخليك..تبقى قاعد وسط ناس.. بيتكلموا في موضوع معين.. وأنت ليك وجهة نظر مختلفة تماما تماما عنهم.. ومع ذلك قاعد ساكت.. واكل سد الحنك ومخروس ولا بتهش ولا بتنش.

ويمكن كمان نلاقيك بتطبل وبتطنطن.. وبتظهر إنك موافقهم ومعاهم تعالوا مع بعض نشوف بعض التفسيرات.

#بتشتري دماغك.. بدل مايجيلك صداع من كتر ماهم مش عاوزين يسمعوا إلا اللي في دماغهم بس.

#اعتقادك اليقيني بأنك مهما اتكلمت عن أفكارك مفيش فايدة ومفيش حاجة هتتغير.. يبقى إيه لازمة الكلام بقى.

#خايف من اللي قدامك يؤذيك.. فتتظاهر بأنك  معاه وهو في الأصل عكسك تماما.

#موافقتك للي قدامك ممكن تحققلك مكاسب ومصالح شخصية..وتاخده على قد عقله لحد ما صلحتك تخلص..وبعدها تقول له بح .

#عاوز تبين وتظهر للي قدامك إنك معاه..علشان تخليه يتفاعل ويفضفض معاك  اكتر..علشان تعرف آخرته واخره أيه (جرجرة رجل).

#عاوز توصل رساله غير مباشرة... لبعض الناس الموجودين والقريبين من اللي بيتكلموا عكس أفكارك.. علشان ماتخسرهمش (لعبة المصالح).

#قلقان يقولوا عليك شاذ في أفكارك.. وشخصيتك خالف تعرف ويستهجنوك ويبعدوا عنك.

#خايف من عواقب الصراع والمواجهة.. معاهم في اعتراضك على أفكارهم.

#مرعوب إن كل الموجودين ينبذوك ويستهجنوك ويقاطعوك.

#بتمشي مع الرايجه وبتطبق قاعدة معاهم معاهم.عليكم عليكم..

#مجرد_خاطرة