أنت ليه مش قادر تاخد قرارك، في حاجة تخص أخص خصوصياتك، إيه اللي مخليك متردد وخايف تاخده.. خوفك ده بعد فترة ممكن يتحول لندم.. صدقني.

ساعتها مش هتقدر تشيله وهيتعبك.. تعالى واحدة واحدة.. نشوف إيه اللي مخوفك.. أولا: إنك خايف تفشل.. وإيه يعني لما تفشل.. الحياة كلها سلسلة محاولات.. مرة تصيب ومرة تخيب.. المهم إن فشلك بيديك ثقة وخبرة.. في اللي جاي بعد كده.. يعني أنت كسبان مش خسران.

أنت عارف خوفك ده ممكن يعمل فيك إيه  ويخليك على طول متوتر.. والتوتر ده ممكن يخليك تتصرف غلط.. وبدل ما كانت مشكلة واحدة مش عارف تاخد فيها قرارك.. هتبقى مشكلاتك كتير بعد كدة..

ثانيا: لازم الناس تكون راضية ومرضية عن القرار اللي هتاخده.. مش بالضرورة... لازم تعرف إن الناس اللي أنت رابط ... رضاهم عليك وأنت بتاخد قرار يخصك.. ميولهم واتجاهاتهم  وسماتهم مختلفة عنك.. وممكن يكون تفكيرهم مختلف عنك... واللي أنت بتحسه وبتشعر بيه... ممكن مايكونوش حاسين بيه أصلا.

علشان كدة شوف أنت من جواك عاوز إيه.. وخد قرارك وشيل كل تبعياته وماتخافش

ثالثا : عدم القدرة على تحمل مسؤولية القرار وتحمل تبعاته.. عدم إحساسك بالمسؤلية، هيخليك طوال حياتك عبد خاضع لغيرك هم اللي هيسيروك وهيتحكموا فيك.. علشان كده لازم تقنع نفسك دلوقتي..إنك إنسان مستقل بنفسك.. وغير معتمد على غيرك.

رابعا :عدم وجود خبرة عندك.. كلنا اتولدنا وجينا الدنيا من غير خبرات.. ولو كل واحد منا تعلل بأنه ماعندهوش خبرات.. يبقى هنفشل.. حاول وماتخافش... وخلي ثقتك بنفسك وقدراتك كبير.. قول لنفسك..أنا أستطيع.