الشخصية المتقلبة انفعاليا.. الثنائية الوجدانية

تلاقيها ساعات في مود عالي قوي..

ابتسامات وضحك وسعادة وتفاؤل..

وبعدها على طول وفي نفس اللقاء أو بعدها بيوم..

وبدون أي حاجة تضايقها..

تلاقيها فجأة قلبت المود..

وبقت كئيبة ونرفوزة ومش طايقة لا نفسها ولا طايقة أي حد.

بصوا ياجماعة..

بنين وبنات.. ستات ورجالة...

في ناس كتير بيطلق على شخصياتهم (ثنائية القطب)

الناس دي طيبين جدا جدا جدا..

بيطلعوا يطلعوا.. وبينزلوا على فشوش..

قلبهم أبيض ذي الفل..

ما يغركش انفعالهم ودخلتهم  فيك وهم غضبانين

بعدها بشوية هتلاقيهم زي الأطفال والملايكة حبوبين.

ممكن تلاقيهم قمة الفرح والهوس في لحظة..

وممكن يكونوا بعدها على طولفي قمة الإنفعال والنرفزة والضيق.

الناس دي بيمروا بمرحلتين.

المرحلة الأولى.. الفرح والهوس

#قمة السعادة والنشاط.

#يتكلم  معاك في أي موضوع بتفاؤل رهيب.

#يتعامل معاك ومع كل الناس بثقة بالنفس مفرطة..

#بياخد قرارات صعبة جدا بوحي انفعالاته مش دماغه

#لما يتكلم معاك أو مع أي حد بتبقى كلماته سريعة جدا

ويا سلام على سلاسة أفكاره الكتيرة والمتنوعة.

#ممكن يعمل تصرفات جنونية..(دماغه لاسعة)

#عنده فرط ونشاط حركي غير عادي.

#مش عاوز يقعد ساكت.

#عاوز يمشي يجري يرقص يتحرك..

#لو معاه مال قارون عاوز يصرفه..

في أي حاجة وأي حتة.

#وياسلام وأنت بتسمعه يتكلم عن رغبته في تحقيق أهدافه.

#ورغبته الشديد في تحقيق ذاته في العمل واوووووو

#من فرط تفاؤله وفرحته بيبقى مش عاوز ينام.

#ولو متجوزا ينتابه رغبة جنسية مع عاليه قووي.

#وطبعا تركيزه ضايع

المرحلة التانية.. الاكتئاب

فجأة تلاقي البنت أو الست دي بقت نسخة تانية خالص.

كل اللي فات حمادة واللي جاي حمادة تاني خالص.

#تبدأ مشاعر الحزن تغزوه وتسيطر عليه تماما.

يعني ممكن تلاقيه عمال يعيط لوحده..

وصعبان عليه نفسه وظروفه وقدره.

كلامه كله بيسيطر عليه اليأس..

وإنعدام أي بارقة أمل.

من الآخر كده عامل زي الدومينو.. قفلت من كل حته.. #أفكاره انتحاريه في الوقت ده.

ولو دورت على السبب..

هتلاقي تفاهات..تفاهات.. تفاهات

#مش بيعرف ينام في ظل أجواء اليأس والنكد والاكتئاب.

#عنده على طول صداع وزغللة وشرود في الذهن.

#بيفتقد أي نوع من الاهتمام بحياته اليومية.

#مش عاوز ياكل ولا يحب ولا يتكلم ولا يتفاعل..

ولا أي حاجة في أي حاجة خالص.

#مرهق ووشه باهت وأصفر وتعبان ومجهد

بصوا ياجماعه..

لو الأعراض الثنائية دي..

خفيفة ولا تؤثر على الشخص يبقى خير وبركة..

لكن لو زادت حدتها يبقى لازم مراجعة..

أهل التخصص في الإرشاد والعلاج النفسي..

#إما علاج دوائي..

#علاج سلوكي معرفي..

#علاج أسري دينامي .

وأنا شخصيا أفضل العلاجات السلوكية المعرفية الانفعالية.

مجرد خاطرة