كشفت تحقيقات النيابة العامة، فى القضية رقم 13401 لسنة 2021 جنح النزهة، والمتهم فيها ع. خ "طبيب بشرى" والمعروفة إعلاميا بواقعة "طبيب اسجد للكلب"، عن أقوال الممرض ع . س من خلال نص التحقيقات.

وقال الممرض المجنى عليه خلال التحقيقات: "أنا باشتغل ممرض طوارئ وممرض عيادات العظام فى مستشفى خاص من حوالى 20 سنة، وبكون مساعد للطبيب اللى موجود فى العيادة فى حالة تغيير جبس أو تركيبه أو أى حاجة بيطلبها الدكتور، وده فى الغرفة المخصصة للعيادة أو غرفة التركيبات".

واستكمل: "الفيديو اللى اتنشر ثابت فيه أنا وكنت لابس بدلة تمريض زرقاء وظاهر فيه المدعو ع. ر وكان لابس أزرق وكمان سكرتير العيادة وظاهر فى آخر المقطع دكتور م. م وهو كان لابس بالطو أبيض ودكتور ع هو اللى كان بيوجهلى الكلام والإساءات اللى فى الفيديو ومش ظاهر فى الفيديو خالص".

وتابع مؤكدًا أن ما تم عرضه فى الفيديو هو ما حدث بالفعل دون تحريف أو تعديل على محتواه، مشيرًا إلى أنه تم التقاط الفيديو داخل المستشفى فى عيادة العظام بالطابق الأرضى، منذ 6 أشهر أو أكثر وأنه غير متذكر الفترة.

وأضاف المجنى عليه فى واقعة اسجد الكلب: "مفيش أى علاقة بمستشفيات جامعة عين شمس والواقعة، وأنا أظن أنه تم ذكر الاسم نظرا لعمل الدكتور رئيسا لقسم العظام بكلية الطب جامعة عين شمس".

واستطرد ممرض واقعة اسجد للكلب: "الفيديو اتصور من خلال تليفون الدكتور ع. خ، وأنا عرفت خلال الواقعة لكن لحظة دخولى الغرفة مكنتش أعرف أنه بيصور، لأنه كان ماسك التليفون فى أيده لكن مش ظاهر هو بيستخدمه ولا بيصور".