عزيزي الأب..عزيزتي الأم..عزيزي الأخ الأكبر.

لما تجيلك بنتكم زعلانه من جوزها.. وتقولكم جوزي طردني ..وجت لوحدها.. بشنطة هدومها مجرجرة وراها عيالها.

ياريت تسمعوها وتحتوها وتدعموا نفسيتها

الست في الوقت ده ..بتكون نفسيتها مدمره وضهرها مكسور.. مش ناقصاكم كأباء وأمهات تيجوا عليها... بكلام مالوش اي ستين لازمه ممكن يكسرها اكتر ماهى مكسورة ومحطمة.

مايبقاش اسهل كلمه على لسانكم ارجعي.. لبيتك وجوزك وعيالك ... والست مالهاش غير بيتها وجوزها.. ازاي إذا كان جوزها اللي عاوزين ترجعله.. هو اللي طاردها وهو اللي كاسرها ومبهدل كرامتها.. إلا إذا كنتم أنتم شخصيا عاوزين تخلصوا منها.

و مش عاوزين تتحملوا مسؤلية وجودها عندكم.. على أي مستوى من المستويات⁉️
عزيزي الأب ..عزيزتي الأم..

لو بنتكم غلطانه ومحتاجه اعادة توجيه وارشاد.. قوموا بدوركم الارشادي معاها وقولولها كلمتين يرجعوا عقلها في راسها لو كانت مقصرة في حق بيتها وجوزها لكن لو اتضح ان جوزها افترى عليها وظلمها واستباح لنفسه بعترة كرامتها فلازم تقفوا قصاده وتتمنوا بنتكم..

مش تقولولها بيتك اولى بيكِ

واضح إن كثير من الآباء والأمهات.. ماصدق يجوز بنته ويخلص منها ومش عاوزها ترجعله تاني حتى لفترة محدودة. بعض الأزواج المرضى نفسيا.. بيقسوا على مراته لما بيحس .. إنها مالهاش ضهر يسندها ولا كتف يحميها
#مجرد _خاطره